Според резултатите од истражувањето на друштвото на мексиканските научници, лилјаците се плашат од месечевата светлина и за време на полна месечина најчесто остануваат скриени.

Спротивно на вреженото верување и бројните хорор филмови во кои може да се види кадар од лилјак како пролетува под полна месечина, поголемиот број од тие летечки суштества се плашат од месечината.

До тој заклучок дошле мексиканските научници анализирајќи и организирајќи ги податоците собрани во повеќе различни истражувања за време на изминатите 20 години.

Потпирајќи се на тие податоци, изработиле модели на однесување на поединечни видови лилјаци, зависно од нивните места на престојување и висините на кои летат.

„Во местата на живеење до кои светлината на месечината допира полесно, активноста на лилјаците е помала во однос на лилјаците кои живеат на помрачни места“, рече за BBC водителот на истражувањето Ромео Салдана-Васкез.

Причините за тоа би можеле да лежат во поголемата изложеност на овие цицачи на предаторите, што значително им ја отежнува потрагата по храна, а можно е и затоа што бубачките со кои се хранат исто така ја избегнуваат ноќната светлина.

Единствен исклучок се лилјаците кои претежно летаат над крошните на стеблата. Тие летат значително побрзо од другите свои „роднини“ и најчесто живеат на подрачја каде што има помалку видови кои би се нахраниле со нив.