Децата родени во 2012 година ќе работат до 70 години, ќе го исплаќаат својот студентски кредит до 52 години и ќе стапат во брак осум години подоцна од годините на кои стапиле во брак нивните родители.

Оваа генерација бебиња се нарекува и „новите стогодишници“ затоа што третина од нив имаат шанси да доживеат сто години старост, пишува во извештајот кој за фирмата Scottish Widows го изработил економистот Стив Лукас.

Извештајот предвидува дека животите на овие деца доста ќе се разликуваат од животите на нивните родители, баби и дедовци. Согласно со тоа, овие деца своето прво дете ќе го добијат на 31 годишна возраст што е и до две години подоцна од нивните родители и пет години подоцна од прародителите кои своето прво дете го имале на 26 години. Се очекува и дека ќе порасне бројот на луѓе кои ќе немаат деца и оние кои ќе имаат најмногу едно дете, а тоа им се препишува на се повисоките трошоци за живот.

Извештајот се темели на разговорите со родителите на 1.000 деца помлади од 5 години и на анализата на службените податоци од Уредот за британска национална статистика. Според извештајот, децата родени оваа година во пензија ќе одат дури на возраст од 70 години додека нивните родители ќе ги напуштат работите на 66 годишна возраст, а нивните прародители на возраст од 63 години.

Исто така се очекува третина од децата во Велика Британија родени оваа година да го доживеат својот стотти роденден. „Подолгиот животен век значи дека тие деца ќе мораат да заштедат доволно за да можат добро да живеат откако ќе отидат во пензија по 70 година“, рече Иан Мекгоан, водител на вложувањата во Scottish Widows.