Ако сте обожавател на Господарот на прстените, оваа реплика ќе ве воодушеви. Уметникот Џереми Телфорд поминал 40 часа создавајќи копија од куќата на Билбо Багинс од 2.600 балони.

Балони сакаат и малите и големите, посебно кога од нив ќе се направи нешто како ова. Американскиот уметник Џереми Телфорд земал слободен викенд за од 2.600 балони да направи реплика на дневната соба на семејството Багинс од популарната трилогија Господарот на прстените на Џ. Р. Р. Толкин.

Иако репликата можеби не е баш прецизна како онаа во филмот на Питер Џексон, сепак на Џереми треба да му се симне капа. Џереми големо внимание посветил и на најситните детали како што се каминот, лустерот, и покуќнината кои Толкин ја има опишано во својата книга.

„Прво на интернет ја проучував англиската покуќнина во 18 век, потоа повторно го прочитав Хобитот и почнав да работам на скицата за куќата“, рече Џереми.

Бидејќи сликите не би можеле да ја доловат големината на оваа креација, уметникот направил time-lapse видео кое ги следи сите 40 часа од неговата работа, а кое можете да го погледнете и вие.