Секој има најомилен начин на опуштање, но ако сте меѓу оние кои сакаат да читаат книги не сте можеле да изберете подобар начин на релаксација. Истражување докажало дека читањето опушта подобро од можеби попопуларните методи на разонода: слушање музика, пиење кафе и шетање.

И шест минути поминати со омиленото четиво е доволно за да се смириме, односно нивото на стрес паѓа и се намалува бројот на отчукувања на срцето и напнатоста во мускулите.

Психолозите веруваат дека тоа е така затоа што во текот на читањето мозокот мора да се концентрира на четивото, а таквиот начин на разонода при што човекот „заминува“ во некој друг свет ја смалува напнатоста во мускулите и делува погодно на срцето.

Потребата на човекот за бег во измислен свет посебно доаѓа до израз во несигурните економски времиња кога сакаме на кратко да побегнеме од реалноста, тврдат професионалците.

По читањето, втор најефикасен начин на опуштање е слушањето музика, трет е пиењето на кафе или чај, а четврт начин е прошетката, покажало истражувањето. Стресот го намалуваат и видео-игрите, но оние, за разлика од останатите методи, ги забрзуваат отчукувањата на срцето.