Ограбувач се изнервирал поради долгото чекање и ја напуштил банката без плен.

Неименуван маж влегол во банката Чејс во Мирамар, Флорида, го чекал својот ред на шалтерот и на работничката и дал парче хартија на кое пишувало „Ова е грабеж, наоружен сум, дај ми ги сите пари од касата“.

Работничката го напуштила шалтерот, кажувајќи му дека оди по парите, и го повикала обезбедувањето кое ја алармирало полицијата. Ограбувачот цело време мирно стоел пред шалтерот.

Бидејќи рекол дека е наоружен, обезбедувањето не му приоѓало туку одлучило да ја почека полицијата. Но, по десетина минути, тој се „изморил“ и изнервирано излегол од банката - директно во рацете на полицијата.

„Ни кажа дека навистина планирал да си оди со парите, но дека повеќе не можел да чека затоа што тоа го фрустрирало“, кажала Тања Рус од полицијата во Мирамар.

Тој е уапсен и обвинет за обид за грабеж. Полицијата утврдила дека немал оружје при себе.