Терапијата против болки и мерките за нивно ублажување претставуваат дел од правата на луѓето за постигнување на добра здравствена состојба, оценила Светската здравствена организација (СЗО) по повод Денот за борба против болки.

СЗО истакнува дека на поголемиот број заболени во земјите со ниски или средни примања, каде има хронични болеси, како што се ракот и СИДА-та, им е недостапна терапијата против болки.

Според податоците на СЗО, секоја петта личност страда од умерени или силни хронични болки, а болката и го оневозможува или отежнува самосталниот живот на секоја трета личност, додека секоја четврта личност изјавила дека болката ги пореметува или доведува до прекин на односите со семејството или пријателите.

СЗО наведува дека аналгетиците не се достапни секаде, пред се во земјите во развој, поради непознавање на нивната медицинска употреба, како и поради ограничувањата кои ги претставуваат прописите и цените.

Професионалците за болка наведуваат дека ублажувањето на болката би требало да биде право на секој човек, без разлика дали е болен од рак, СИДА или било која друга болест проследена со болка.