Откако се разбудила од кома, 32 годишната Сара Томпсон мислела дека е 1998 година и дека таа се уште е тинејџерка. На својот сопруг, како и на своите три деца, воопшто не се сеќавала.

Сара десет дена била во кома откако била подложена на итна операција на мозокот. Токму тој период избришал четиринаесет години од нејзиното сеќавање. Кога се разбудила, мислела дека Spice Girls се уште на врвот на музичките листи, дека Mајкл Џексон е уште жив и дека таа има само 19 години.

Не само што се разбудила со уверување дека живее во деведесетите, туку не ни претпоставувала дека се омажила и дека има деца. „Кога децата дојдоа да ме видат, немав поим кои се. Мислав дека се некои туѓи деца“, се присетува Сара. Својот сопруг исто така не го препознала, мислела дека тој е дел од персоналот кој се грижел за неа додека била во болница. „Секогаш беше околу мене, така што претпоставував дека е некој кој работи за болницата“, рече Сара.

Нејзината мајка се трудела да и објасни дека тоа е нејзиниот сопруг, но таа не се сеќавала на ниту една средба со него, како ни на нивната венчавка. „Морав повторно да се вљубам во него. Ме водеше на сите места каде што сме биле откако сме се запознале и така ми помагаше да си го вратам сеќавањето“, рече Сара.

Често гледале и заеднички фотографии за да се присети на детали од својот живот пред операцијата, но таа имала чувство како да гледа друга личност. Сепак, со силни напори успеала да врати некои од сеќавањата и повторно да го обнови својот живот. „Сакам да им дадам надеж на другите луѓе и да им кажам дека се е можно да се преживее“, додаде таа.