Млад германец не можел да поверува кога преку пошта добил тужба од факултетот на кој дипломирал...

Марсел Пол (22) бил горд кога дипломирал на Факултетот за економија и менаџмент во Есен, и тоа во рок од три семестри. Вредниот студент дал 60 задолжителни испити за само 20 месеци, и стекнал мастер диплома. Наместо да му честитаат на несекојдневниот успех, факултетот го "почестил" со тужба.

"Преку пошта ми стигна писмо од факултетот во кое се наведува дека ќе мора да одговарам на суд зато што сум дипломирал прерано. Изгледа ме тужат бидејќи им ја "скратив материјалната добивка", затоа што платив само три семестри и за тоа време го завршив факултетот", изјавил разочараниот студент.

Тој навел дека нему и уште двајца колеги управата на факултетот при уписот им одобрила со "свое темпо" да ги полагаат испитите, но дека во тужбата пишува дека брзото доаѓање до диплома го оштетил факултетот за речиси 4.000 евра. "Ми бараат да платам 3.772 евра колку што требаше да платам ако студирав четири години. Толку за тоа дека успехот, работата и трудот се наградуваат", изјавил Пол.