Работодавците кои сакаат да ја зголемат продуктивноста на своите вработени, би можеле да го послушат советот на научниците и да им дозволат на работниците на работа да го донесат својот четириножен миленик.

Кучињата на работно место не само што можат да го намалат стресот на своите работници, туку да ја направат работата попријатна за нивните колеги, па и целиот колектив, тврдат американските научници.

„Кучињата на работно место можат да направат позитивна разлика“, рече водачот на истражувањето, професор Рандолф Баркер од универзитетот Вирџинија Комонвелт.

„Тие се како голем тампон кој ги ублажува ударите од стрес, позитивно делуваат на продуктивноста, влијаат на намалувањето на изостанувањето од работа и го поттикнуваат работниот морал“, наведе Баркер.

Претходните истражувања покажале дека дружењето со кучиња го намалува крвниот притисок, како и дека благотворно делува на пациентите во болница и старечки домови.

Меѓутоа, научниците напоменуваат дека е важно кучето да биде добро истренирано и послушно за да не предизвика уште поголем стрес и хаос, наместо опуштање.