Учениците секоја недела поминуваат по неколку часа пишувајќи домашни задачи, но прашањето е дали од тоа имаат повеќе штета или корист.

Истражувањето спроведено во Австралија покажало дека домашните задачи не им донесуваат никаква вистинска корист на децата во пониските одделенија во основните училишта, а дека позитивното влијание на домашните задачи на успехот во училиштето и квалитетот на стекнатото знаење се забележува дури кај децата постари од 11 и 12 години.

„Нашето истражување покажа дека во земјите во кои училишниот систем подразбира обемни и чести домашни задачи академските достигнувања на децата се послаби отколку во земјите во кои тоа не е практика“, вели д-р Ричард Вокер, професор на универзитетот во Сиднеј.

„Обемот и бројот на домашни задачи на децата навистина може да им претставува проблем. Ако се затрупани со обврски немаат време да уживаат во учењето на нови работи и стекнување на знаења.“

Обемните домашни задачи имаат поента дури во постарите одделенија, вели д-р Вокер и додава дека, иако звучи неверојатно, често се случува наставниците да им зададат на децата домашни задачи затоа што родителите тоа го очекуваат од нив.