Една мачка преживеала пад од 19 спрат од стамбено-работна зграда во Бостон.

„Некој на вториот спрат забележал дека нешто поминало паѓајќи пред нивниот прозорец. Погледнале надвор и виделе дека мачката паднала, се дочекала на нозе, а потоа истрчала“, раскажа Брајан О’Конор од бостонското згрижувалиште за животни.

Нивниот тим веднаш дошол до таа зграда. „Кога дојдовме, вработените во зградата ја пронашле мачката и ја згрижиле внатре“, рече О’Конор.

Во почетокот не биле сигурни од кој точно спрат паднала, па ја однеле на ветеринарен лекар. Таму на нејзиниот нос е откриена мала исеченица, а рендгенската снимка покажала дека со внатрешните органи се е во ред.

За среќа, мачката била микрочипирана, па сопственикот брзо е пронајден. Живеел на 19 спрат од таа зграда и така е откриено од кој спрат скокнала оваа мачка.

„Ова е навистина среќна мачка“, коментирал О’Конор и на медиумите им рекол дека дел од нејзината среќа лежи во тоа што не паднала на бетон, туку на површина со трева.