Освен пцовките кои би требало целосно да ги исфрлите од речникот, има уште некои зборови кои не би требало да ги употребувате пред децата. Или барем не пречесто.

„Мразам“. Вие можеби зборувате за неподнослива гужва во сообраќајот, ред во самопослугата или реклама на телевизијата, но кога се децата во прашање „мразам“ понекогаш може да биде употребено во контекст на другар од одделението, наставник или роденденски подарок, што може да предизвика многу повредени чувства.

„Глуп“. Еден од зборовите со кои најлесно се изразува омаловажување на другите... а децата умеат да го повторуваат, повторуваат, повторуваат...

„Идиот“. Толку е навредлив, што нема потреба да се наведуваат причини зошто не би требало да го употребувате овој збор пред децата.

„Не“. Се разбира, не можете да не изговарате „не“, посебно ако имате мало дете, но обидете се да ја намалите „фреквенцијата“, за да не дојдете во ситуација тој збор да стане новиот омилен збор на вашето тригодишно дете.

„Замолчи“. Никогаш не му кажувајте на детето (или на било кој друг) да замолчи.

„Палав/а“. Ова е исто така неизбежно, но исто како и „не“, не би требало да се користи премногу често. Ако на детето постојано му кажувате дека е палаво, целосно ќе го демотивирате.