На двајца Британци им била вратена техниката со порака со извинување и десет фунти „поради нервирањето“.

Непознат крадец од комбето на Кевин Инграм украл уред за сателитска навигација и дигитално радио минатата недела. Инграм и неговата сопруга Сју биле потиштени затоа што навигацијата е клучна за неговата работа како возач, а радиото било роденденски подарок од неговиот син.

Меѓутоа, пред неколку дена, на ветробранското стакло затекнале необична порака.

„Извинете што ви украдов неколку работи, бев многу пијан. Ги враќам, ги оставив во ќесе покрај куќата со знак ‘Пазејте се, деца’. Се надевам дека брзо ќе ги пронајдете, а еве и десет фунти за да ви се оддолжам за нервирањето“, пишувало во пораката.

Инграмови своите работи, како и банкнотата од 10 фунти навистина ги пронашле покрај куќата во својата улица во Свонт, Кент. Во ќесето имало и освежувач за воздух „дрпнат“ од ретровизорот во комбето.

Парот одлучил кражбата да не ја пријави во полиција, затоа што ги добиле назад своите работи, а и крадецот очигледно искрено се покајал.