Со доаѓањето на новата сезона сакаме да го освежиме својот моден ормар со нови парчиња за носење со кои ќе го откриеме своето ново модно јас, или ќе го потврдиме својот препознатлив стил. Креативните технолошки иноватори се обиделе да го решат, за многумина неподнослив дел од шопингот, односно испробување на избраната облека со помош на волшебно огледало.

Доколку сакате да купувате, но не и да пробувате, тогаш ќе ве развесели идејата според која огледалото виртуално ја прикажува вашата слика со избрани алишта за носење.

Користејќи 3D технологија огледалото во обѕир ја зема висината и обликот на телото, а по запишаниот бар код на саканиот фустан, може да се провери како би ви стоел тој.

Волшебното огледало веќе го нарачале продавници како Karen Millen и Coast во Велика Британија, но се очекува нивна масовна употреба ширум светот затоа што штеди време и го олеснува шопингот кој е омилено хоби на многумина.

Огледалото за прв пат ќе биде прикажано во Trafford Center во Манчестер каде ќе биде демонстрирана неговата употреба. Произведувачите Apache Solutions очекуваат голем успех, а главниот дизајнер Adam Vahed вели дека идејата долго време му се вртела низ главата и дека е воодушевен од конечниот производ.