Ако нешто не им е јасно, денешните деца ќе го „прашаат“ Google, а не мама и тато.

Родителите секогаш очекуваат детето да им се обрати ако има некој проблем или ако го мачи некоја дилема, но истражувањето спроведено во Англија покажува дека денешните деца попрво го „прашуваат“ Google.

Истражувањето е спровеено меѓу деца на возраст до 15 години, а резултатите покажале дека поголемиот број од нив одговорите попрво би ги побарале на интернет - 54% од испитаниците изјавиле дека потребните информации прво ќе се обидат да ги пронајдат со пребарувачот Google, наместо да им се обратат на родителите или наставниците.

Дури секое четврто дете во случај на некоја недоумница прво им се обраќа на родителите.

Енциклопедиите се во уште полоша положба - тоа е последното место на кое младите ќе ги побараат податоците кои им се потребни, а четвртина од анкетираните деца воопшто немаат претстава што е тоа енциклопедија воопшто.

Нагаѓањата за тоа што би можело да биде енциклопедија се движеле од „нешто со што се патува“ до „нешто што се користи за да се изврши операција“.

Речиси половина од малите испитаници, 45% од нив никогаш не користеле печатена енциклопедија, а 19% никогаш не употребиле печатен речник.

Во истражувањето учествувале 500 испитаници на возраст до 15 години, а резултатите покажале дека околу 50% од нив го користат Google барем пет пати дневно.

„Децата денеска растат во дигитално опкружување и поставени се нови стандарди. Информациите за се што ги интересира се на ‘еден клик’ од нив и не е ни чудо што се поретко им се обраќаат на родителите“, вели д-р Пем Вадел, која била шеф на истражувачкиот тим.

„Сепак, иако резултатите можат да делуваат сурово на прв поглед, не мора да значи дека тој правец на развој е нужно лош. Тоа само значи дека денешните деца дигиталната технологија ја доживуваат како нешто блиско.“