Магазинот Форбс ја објави најновата листа на најбогати луѓе на светот на која и оваа година се задржал мексиканецот Карлос Слим со богатство кое се проценува на 69 милијарди долари...
Слим своето богатство го заработил во телекомуникациите, 72 годишникот е претседател на управата на мексиканската компанија Telmex. Но, не може да се каже дека светската криза не го погодила и него, бидејќи богатството за една година му се намалило за 5 милијарди евра, поради падот на вредноста на акциите на телекомуникациската компанија America Movil.
Гејтс и Бафет - сребрена и бронзен медал
На второ и трето место се нашле американците, Бил Гејтс и Ворен Бафет, со богатство кое изнесува 61 и 44 милијарди долари. Гејтс своите милијарди ги стекнал најмногу поради основањето на Microsoft, додека Бафет е сопственик на инвестициската компанија Berkshire Hathaway.
На овогодинешната листа на Форбс се нашле дури 1226 милијардери што е најголем број во историјата. На четврто место се сместил сопственикот на луксузна стока LVMH, французинот Бернард Арнаулт, со 41 милијарди долари, а го следат шпанецот Амансио Ортега, американецот Лари Елисон, бразилецот Еки Батиста, швеѓанецот Стефан Персон, Ли Ка Шин од Хонг Конг и на 10-тото место германецот Карл Албрехт.
Повеќето милијардери, дури 425 и оваа година доаѓаат од САД, додека на второ место се наоѓа Русија, од нив 96, а на трето место завршила Кина со неколку луѓе помалку. Најмногу милијардери живеат во Москва, потоа во Њујорк и Лондон.
