Научниците во Кина утврдиле дека девојчињата се подобри во аритметика, и тоа поради развиените вербални вештини.

Истражувањето спроведено на универзитетот во Пекинг опфатило деца од двата пола на возраст од осум до дванаесет години, кои решавале тестови од неколку предмети, меѓу кои биле јазици и аритметика.

Девојчињата подобро се покажале во областа на едноставно одземање и комплексно множење, а побрзи биле и во препознавањето на збир со поголем број членови и одредување на зборови кои се римуваат.

Момчињата биле поспори и во продолжување на низа броеви на основа на зададено правило, но биле подобри во замислено ротирање на тридимензионални објекти.

Авторот на истражувањето, Шинлин Жу од универзитетот во Пекинг вели дека клуч на успехот на девојчињата во аритметиката е во нивното подобро вербално снаоѓање.

„Напредната математика бара вербално процесирање, како што е броење или помнење на таблица за множење, а подобрите јазични вештини доведуваат до поефикасно сметање“, објасни тој.

Студијата е објавена во списанието „Психолошка наука“, а Жу вели дека родителите и училиштето би требало да поработат на развивање на вербалните вештини кај момчињата, за подобро да им одат природните науки.