Цирих прв пат по 20 години го замени Токио на првото место на листата за најскапи градови за живот, покажуваат податоците на истражувачката служба на британската публикација Економист (Economist Intelligence Unite, EIU).

Засилувањето на швајцарскиот франк доведе и Женева да биде на трето место на таа листа, кое го дели со јапонскиот Осака Кобе.

На листата на најскапи градови потоа следуваат Осло, Париз, Сиднеј, Мелбурн, Сингапур и Франкфурт.

Истражувањето на EIU се спроведува два пати годишно и опфаќа споредување на цената на 400 производи и услуги во 130 светски градови, вклучувајќи ги и цените на храната и пијалоците, облеката, транспортот, ќиријата, трошоците за школување и рекреација.

Најскап град во Северна Америка е канадскиот Ванкувер кој е на 37 место, додека најскап град во САД е Лос Анџелес кој е на 42 место, покажа тоа истражување.

На крајот на листата е пакистанскиот град Карачи, а пред него се индијскиот Момбај и иранскиот Теран.