Професорка по англиска литература од универзитетот Вашингтон и Ли заклучила дека читањето на делата на Роулинг има долгорочно влијание врз читателите.

Професори од факултети и универзитети ширум светот почнале да ги предаваат книгите од „Хари Потер“ серијалот на Џ. К. Роулинг во предавалните. А за оние кои пораснале читајќи ги седумте книги од серијалот, професорите велат дека тие студенти подобро ги разбираат и ценат класиците на Чарлс Дикенс.

Сузан Кин во минатото се борела да ги едуцира студентите за класичните дела на Чарлс Дикенс, чиј 200 роденден е на 7 февруари, и со исклучок на приказната „Божиќна песна“, открила дека студентите од пред шест-седум години не уживале во другите дела на авторот.

„Изгледаше дека студентите ја губеа нивната поврзаност со Дикенс“, вели Кин. „Тоа беше алармантно, затоа што, меѓу викторијанските романсиери, Дикенс е најпопуларен, најзабавен и најлесен за читање - рамо до рамо со Џејн Остин.“

Денеска, студентите кои влегуваат во факултетите и универзитетите со претходно читање на „Хари Потер“ серијалот го „разбираат Дикенс“, според зборовите на Кин. Очигледно, читањето на „Хари Потер“ е како подготвителен курс за читање на Дикенс затоа што „има хумор, карикатурни имиња, има повеќе заплети, има навистина долги приказни кои се читаат со часови и часови и часови, а сепак се ужива во фактот што тие се долги“.

Сузан Кин напишала статија во која и честита на Роулинг што успеала да ги намами помалите ученици со детска верзија на „Дикенсовски свет“. Генерација што ужива во читање на долги книги, разговарање за тие книги со други ученици, повеќе ја ценат класичната англиска литература, како на пример онаа на Шекспир или Дикенс.