Пресли и Етел Бредшо, брачен пар од Кентаки, САД, умреле во разлика од четири часа по 73 години брак.

Прв умрел сопругот, Пресли (101), а по четири часа и неговата животна сопатничка Етел (99). Поради лошо здравје, Етел пред четири години живеела во старечки дом, но сопругот ја посетувал повеќе пати неделно.

„Ја држеше за раката, ја бакнуваше и и кажуваше колку ја сака и колку му недостига“, кажа директорката на старечкиот дом, Шенон Бас.

Му недостигаше друштвото на сопругата, па одлучил да се придружи во старечкиот дом.

„Секогаш беа заедно. Тој знаеше да застане и да праша: ‘Ја запознавте ли мојата прекрасна невеста?’“, додава Бас.

„Беа вистинска персонификација на зборот - ЉУБОВ“, рече една медицинска сестра од старечкиот дом, Чесити Стоудемир.

Етел страдала од деменција, но, и покрај тоа, Бас верува дека била свесна дека нејзиниот сопруг умрел и решила да го следи.

Парот се венчал на 21 октомври 1938 година во Сомерсет, во сојузната држава Кентаки. Имале една ќерка.