Кога ќе ги украдеш подароците на Дедо Мраз, може да се случи потоа да те гризе совеста. И што правиш потоа? Па, ги враќаш подароците, се разбира.

Римски крадци му ги вратиле подароците на Дедо Мраз кои му ги украле и му оставиле порака во која кажале дека се каат, објави денеска сајтот Digital Spy.

Вреќата со подароци во вредност од 1.000 евра била украдена во божиќниот месец на плоштадот Навона во Рим, пред носот на Дедо Мраз - претприемачот Џорди Абручезе.

Во вреќата со подароци кои ја вратиле, крадците ставиле и порака: „Извинете. Згрешивме. Среќен Ви Божиќ и Нова година!“

Абручезе изјави дека е „многу радосен и изненаден од сознанието дека дури и крадците имаат срце“.

Тој вети дека подароците кои ги вратиле „покаените крадци“ ќе им ги раздели на децата по Нова година.