Брачен пар од Германија платил 425 евра за планински спасувач во австриските Алпи од провалија длабока 2.000 метри да „спаси“ плишена жаба.

На спасувачот Маркус Флајшман му требале осум часа да ја пронајде плишаната играчка, своевидна амајлија за Дорис и Јигрген Белман од Минхен.

„Тоа воопшто не беше опасна мисија, а и така немав што друго да правам“, рече Флајшман за весникот Heute.

Случајот се случил минатиот месец во западната австриска покраина Тирол.

Дорис (53) го фотографирала сопругот Јирген (54) со плишаната жаба на врвот Хинтерен Гоингер Халт, висок 2.192 метри. Во еден момент, Јирген се лизнал, но успеал да се задржи и врати назад. Меѓутоа, нивната омилена играчка продолжила да се лизга и паѓа во провалијата.

„Поминавме два дена трагајќи по неа, а потоа се вративме многу тажни“, раскажа Дорис.