Дека прозевањето е заразно се знае од секогаш, но неодамна италијанско истражување покажа дека тоа полесно се „пренесува“ меѓу членови на семејството и пријатели, отколку меѓу непознати личности.

Често се случува кога некој ќе се прозевне, набргу да се прозевнат и сите присутни како по некоја команда.

Меѓутоа, научниците од универзитетот во Пиза утврдиле дека оваа појава е под силно дејство на социјалната емпатија.

Тие тврдат дека прозевањето е позаразно ако врските меѓу „прозевачите“ се потесни и поблиски. Членови на исто семејство или група пријатели се поподложни на поврзано прозевање од група непознати.

За да дојдат до овој заклучок, научниците во тек на година дена го снимиле прозевањето на 109 возрасни личности од цел свет, поделени во две групи, прозевачи и набљудувачи.

Студијата е објавена во американското научно списание PLoS One.