Во Авганистан постои вистинска фобија од бројот 39, кои луѓето во таа земја го доведуваат во врска со проституција и проклетство.

По приказните за омразените регистерски таблички со овој број, кои летото се објавени во Wall Street Journal, BBC известува за нов случај на незадоволство со проклети цифри.

Организаторите на еден собир во Кабула морале да го променат бројот на членови на комисијата од 39 на 41, затоа што делегатите не сакале да бидат асоцирани со „знакот на макроата“.

„Не сакам подоцна во мојот крај да ме нарекуваат макро. Не ми е гајле дали тоа е вистина или не, луѓето едноставно веруваат во тоа. Никој дури и не сака автомобил со тој број на регистерските таблички“, се правда еден делегат, одбивајќи да учествува во работата на комисијата со злокобен предзнак.

Се верува дека целиот метеж со бројот 39 започнал поради извесен макро кој го имал тој број на регистерските таблички на својот автомобил.