Американец пребарал тон ѓубре за да го пронајде прстенот на својата сопруга, кој случајно го фрлил.

Брајан Мегвин од Маргејт, Флорида ја средувал бањата и одлучил да ги фрли старите бричови и други ситници. Случајно од полицата го зел и вереничкиот прстен на жена си, вреден 10.000 долари, и го фрлил во ѓубрето.

Кога сфатил што направил, побрзал по ѓубрарите, кои на депонијата му рекле дека слободно може да пребарува по ѓубрето колку што сака, но успехот не му е загарантиран.

Финансискиот советник храбро се облекол во заштитно одело и „скокнал“ во купот ѓубре висок три метри.

„Беше ужасно. Секоја гадост што можете да ја замислите најмалку еднаш ми помина низ рацете“, рече Мегвин.

Тој по неколку часа успеал да го пронајде прстенот и да го врати на својата воодушевена жена.