Веќе и порано е докажано дека мажите кои имаат деца помалку мрдаат со опашката, а сега научниците утврдија дека татковството позитивно влијае на мажите кога станува збор за пушењето, конзумирањето алкохол и проблематичното однесување.

Група психолози предводени од Дејвид Кер од универзитетот во Орегон во временски период од деветнаесет години го следеле однесувањето на 200 мажи склони кон проблематично однесување кои на почетокот на истражувањето биле стари меѓу 12 и 31 година. Во текот на годините следени се промените во погледот на конзумирање марихуана, тутун и алкохол, како и честоста на инциденти во кои учествувале.

Објавена во списанието „Брак и семејство“, студијата истакнува дека мажите кои станале татковци на 20 или 30 години, значително го намалиле конзумирањето на алкохол и цигари, а и многу помалку биле склони кон криминал, за разлика од оние кои дете добиле додека уште биле малолетни или помлади од 20 години.

Татковството е искуство кое може да го промени однесувањето на мажите, дури и оние кои спаѓаат во категоријата на „лоши“ момци, објаснува Кер. Тој смета дека тоа би можело да значи дека новопечените татковци се отворени за позитивни пораки и дека се подготвени да се менуваат во позитивна смисла.