Читањето е еден од најдобрите начини да поминете квалитетно време со децата, а ако децата ја засакаат книгата во најрана возраст, тогаш сте поставиле одлични темели за нивното идно образование...

Бајка пред спиење е многу повеќе од обичен начин за да ги заспиете децата. Еве зошто е важно да им читате на децата:

-Ако на децата им читате на глас, им овозможувате јазикот да го почувствуваат и доживеат на еден нов, посебен начин, поинаков од секојдневниот. Освен тоа, читањето кај децата го развива чувството за приказна со причинскопоследичен тек.

-Децата чии родители редовно им читале се повешти во читањето и пишувањето кога ќе тргнат во училиште, а и подобро комуницираат затоа што се навикнати да ги слушаат другите.

-Читањето создава посебна врска меѓу детето и личноста која му чита, а сеќавањата на тој ритуал подоцна во животот стануваат драгоцен извор на топлина и нежност.

Значи, читајте му на детето секој ден, читајте му дури и ако имате само пет минути. Шемата на однесување која подразбира секојдневно читање е одличен воспитен модел. Имајте во предвид дека малите деца сакаат рутина, така што однапред ќе се радуваат во уживањето во бајката и во вашата прегратка. Можете да изберете и ваше „посебно место“ за читање - фотелја, кревет или дури куп перници на подот.

Пуштете го детето само да ја избере книгата, но погрижете се секогаш да ја завршите онаа која сте ја започнале. Можете да му кажете нешто за писателот, но задолжително свртете му го вниманието на илустрациите, и оставете му доволно време за да ужива во цртежите пред да преминете на следната страница.

„Менувајте“ го гласот, така што тој ќе одговара на карактерот на јунакот или ситуацијата.

Исто така, важно е да водите сметка да не читате премногу брзо, така што детето ќе може да ги следи случувањата. Ако наидете на некој збор кој му е непознат на детето, потрудете се да му го објасните неговото значење пред да продолжите.

Кога ќе завршите со читањето, разговарајте за книгата. Вратете се заедно да ги погледнете илустрациите, пуштете го детето да ви каже како ја доживеало приказната. Нека ви каже што научило, што му било смешно, а што му било најубаво.

Ако им читате на децата, ќе ги „заразите“, ќе ги претворите во „доживотни“ читатели, а тоа е еден од најскапоцените, најубавите подароци кои можете да им ги дадете.