Наизглед еден сосема обичен овен од шест месеци, но само по својот изглед и тоа што пасе трева, сите други карактеристики ги „зел“ од кучињата, па сопственичката така и се однесува кон него...

Штом проодил, овенот Џек и пришол на кучката Џеси и од тогаш веќе не сакал да се врати во своето стадо, а од „пријателката“ ги примил сите навики како што се шетање и трчање, фаќање стап, па дури и терање на овците, но сè уште не лае.

„Кога се роди, Џек беше многу мал, па само го пренесовме во куќата и го храневме со млеко. Штом прооди, почна да се дружи со Џеси, а тие двајцата сега заедно спијат во корпа на терасата“, вели сопственичката Алисон Сиштат од Шропшајер во Велика Британија.

Џек не покажува никакво интересирање за овците, туку, како куче овчар, ги тера да се соберат, а и кога пасе трева тоа го прави подалеку од стадото.

Ветеринарот Дејвид Хауел вели дека тоа не е необично, затоа што „овците се многу поинтелигентни отколку што луѓето мислат“. „Тие лесно можат да усвојат одреден образец на однесување, но со иста таква леснотија можат да се вратат и во претходната состојба.“