Еден од најпожелните градови во светот не само што ги мами младите луѓе кои сакаат да ги остварат своите сонови, туку една мачка од Колорадо пред точно пет години „избегала“ во Менхетан...

Мачката, која пред пет години исчезнала во Колорадо, пронајдена е како лута по Менхетан и наскоро со авион ќе им биде пратена на сопствениците.

„Животното го нашол еден Њујоркчанец и го донел во прифатилиштето за животни. Благодарение на микрочипот во вратот на мачката, утврдиле дека станува збор за Вилоу, домашно милениче на едно семејство од Колорадо“, соопштено е од прифатилиштето.

За сега не е познато каде Вилоу живеела изминатите пет години, како ни тоа како стигнала во Големото Јаболко, но во Њујорк очигледно не и било лошо.

„Мачката е во многу добра состојба, чиста е и помалку дебелка. Очигледно некој се грижел за неа“, наведено е во соопштението.

Мачката на сопствениците им избегала во 2006 година, додека ја реновирале куќата и најмалку што некој очекувал е дека истата ќе биде најдена после пет години во Њујорк.