Австралиец по грешка го фрлил накитот на својата сопруга, вреден околу 40.000 евра...

Џефри од Калундра, кој не сакал на локалните медиуми да им го открие своето презиме, случајно ги фрлил гривните, ланчињата и обетките на својата сопруга во ѓубрето, и тоа воочи на нивната 23 годишница од бракот.

„Се селевме, и куќата беше преполна со ќеси. Накитот намерно го поделивме во неколку ќеси, за во случај на кражба да не останеме без се. Сепак, некој ќесите ги ставил на погрешно место, јас мислев дека станува збор за ѓубре, па ги фрлив“, призна Џефри за локалните медиуми.

„Сопругата следниот ден ме побара на работа и со растресен глас ме праша каде се ќесите. Ми дојде да си ја искорнам косата од мака“, вели тој.

Џефри сега бара дозвола од градските власти да ја пребара депонијата, иако знае дека шансите дека некогаш повеќе ќе го види накитот му се речиси еднакви на нула.

„Ми кажаа дека можам да копам ако сакам, но дека депонијата во Калундра неделно добива околу 1.400 тони ѓубре“, рече тажниот австралијанец.