Заедничкото уживање во видео игрите е квалитетно поминато време, а ќе допринесе и за близина меѓу родителот и детето...

Родителите често се жалат дека децата премногу време поминуваат пред компјутерот, но можеби не би било лошо да им се придружат. Наместо постојано да се расправаат со децата околу игрите и да се обидуваат да ги спречат со часови да се забавуваат пред екранот - подобро да си играат заедно.

Судејќи според резултатите од истражувањето кое го спровеле научниците од универзитетот Голдсмитс, третина од родителите играат видео и компјутерски игри со своите деца, 80% од нив сметаат дека таквата забава е квалитетно поминато време, а секој трет вели дека заедничкото играње допринело за подобро разбирање со децата.

Психолозите велат дека играњето игри за последица има и подобро разбирање на новите технологии. Секој петти родител кој учествувал во истражувањето изјавил дека неговото дете станало вешто со ракувањето со техниката, благодарение на игрите, а анкентираните постари членови на семејствата, баби и дедовци, велат дека заедничкото играње допринело за зближување со внучињата.

Пораните истражувања покажале дека игрите позитивно влијаат и на способноста за фокусирање и концентрација. Сепак, научниците потсетуваат дека денеска се почесто се забавуваат дома и помалку време поминуваат на свеж воздух, па родителите би требало да се погрижат малите да се занимаваат и со некој спорт.