Една жена од Швајцарија купила од Женева боенка за своите деца и во неа, на нејзино запрепастување, открила страници со порнографска содржина...

„Сакав да им ја дадам боенката на своите ќерки од 10 и 16 години да се забавуваат во текот на патувањето на одмор со авион“, рече мајката за La Tribune de Geneve.

„Прво помислив дека тоа е лоша шега на некој малоумен. Но, набрзо сфатив дека и други примероци ја имаат истата маана“, додаде, велејќи дека боенката ја купила во киоск во Женева, а за тоа ја известила и полицијата.

Dessiner (Цртање), е списание за широк круг читатели со препораки за усовршување на вештината цртање, обично има 50 страници, на кои во оваа издание се додадени 16 страници со прикази на оргии.

Списанието е едно од изданијата на издавачот од Париз, Multimedia Press, а во Швајцарија се продава преку специјалниот дистрибутер Naville, кој од продажба веднаш повлекол осумстотини примероци.

Извршниот уредник на Multimedia Press, Мануел Орнато за La Tribune de Geneve рече дека можеби има „грешка во печатењето“ и најави повлекување од продажбата на боенката испечатена во повеќе од 100.000 примероци.